GAAROODI NEWS NETWORK

DHACDO YAAB BADAN OO KA DHACDAY XAAFAD KA MID AH MAGAALADA HARGEYSA WAA FAL KU CUSUB MAGAALADA HARGEYSA NOOCIISE OO AAN HORE LOOGU ARAG AADNA UGA YAABIYAY DADKII MAQLAY

 

DHACDO YAAB BADAN OO KA DHACDAY XAAFAD KA MID AH MAGAALADA HARGEYSA

WAA FAL KU CUSUB MAGAALADA HARGEYSA NOOCIISE OO AAN HORE LOOGU ARAG AADNA UGA YAABIYAY DADKII MAQLAY

Hargeysa: Sep 23, 2016 (Hererstar.net)- Dhacdadan fajicisada noqotay ayaa ka dhacday xaafad ka mid ah xaafadaha magaalada Hargeysa gaar ahaan xaafadaha ugu bilicsan uguna casriyeysan ee muhiimka ah taas oo ah xaafada Masalaha kadib markii xaajo ugub ah lagu arkay xalay goor habeennimo ah

Taas oo mar kaliya uun lagu war helay booyad kuwa bulaacadaha qaada ah oo wasakh ku qubeysa guri ku yaala aagaasi waxaana loo adkeysan kari waayay urka qudhmuun ee ay booyadu ku shubeysay gurigaasi  iyada oo ay goobtaasi ka dhawaayeen masuuliyiin ka tirsan qaranka Somaliland halkaas oo ay kula kulmeen baabuurkii booyada ahaa ee qudhunka ku shubayay meeshaasi waxa ayna weydiiyeen markii ay gaadheen goobta sababta  ku kaliftay inay meel  la dagan yahay ku shubaan wasakhda iyaga oo ugu jawaab celiyay in ay fasax ka heleen dadkii lahaa guriga ay wasakhda ku shubayeen islamarkaana ay muddo saddax bilood qiyaastii ah ay ku soo shubayeen meesha qudhunka ay bulaacadaha kasoo qaadaan.

Intaasi kadib waxaa ay masuuliyiintaasi la hadleen saldhigii booliska ee ugu dhawaa goobta waxa ayna ku wargaliyeen falka foosha xun ee ay ku kaceen nimanka watay booyadaasi iyagoo u sheegay in ay baadhaan danbigaas booyada iyo ragii watayna la qabto

Amuurtaasi ayaa maanta ahayd mid aad looga hadal hayay goobaha ay dadku ku kulmaan ee magaalada Hargeysa gaar ahaan xaafadii ay arrintani ka dhacday

Si kastaba ha ahaatee waxaa aad looga yaaban yahay sababta nimankaasi ku kaliftay in ay ka shaqeeyaan caafimaad darrada intaas le’eg iyo halista fayadhowr ee ay keeni karto. Waxaa la filayaa in ay dadka ku lugta leh falkani ay waajahaan sharciga tallaabana laga qaado iyada oo ay dareen cadho leh ka muujiyeen dadweynaha ku dhaqan deegaankaasi

Wariyayaal ka tirsan saxaafada madaxa banana oo saaka soo booqday goobta falkani ka dhacay ayaa la kulmay saraakiisha bileyska ee saldhiga  masalaha waxa ayna u xaqiijiyeen in uu falkani xalay dhacay islamarkaana ay baadhayaan gacantana ku hayaan darawalkii iyo baabuurkii dambiga lagusoo qabtayna ay xidhan yihiin

Warar aan la xaqiijin ayaa sheegaya in booyada wasakhda siday uu leeyahay hotel caan ah oo ka mid ah hoteelada magaalada Hargeysa wasakhdana ay halkaa ka soo qaadi jirtay taas oo dhaawac weyn u gaysan doonta haddii uu danbigaasi ku caddaado

Xubno ka tirsan dadweynaha deegaanka  oo aad u cadheysan ayaa ii sheegay in ay arrintan khatar caafimaad iyo mid saxaba ku leedahay meel ka dhacna ay ku tahay xaafada sidaasi darteedna aanay ka hadhi doonin ilaa ay sharciga la tiigsadaan hay’adaha ku shaqada leh ee ay ka midka tahay dowlada hoosana ay ku wargalin doonaan .

 Xigasho hererstar

Gaaroodi News Online – Nagala soo xidhiidh Emailkan:  GAAROODINEWSNET@GMAIL.COM

 



Leave a Reply